孩子睇電視上癮,父母「情非得已」非藉口

因為近來work from home,阿豬的screen time 大增。以往是隔天看20分鐘,後來增至隔天40 分鐘,現在甚至隔天一小時,必要時再加。一切一切,完全因為大人想「安靜一下」。情非得已時,一句:「你有冇卡通片想睇呀?」可帶來片刻寧靜。久而久之,成了習慣。

上星期,阿豬投訴他當天看的卡通片太短。

「我點知你,係你自己揀嘅,你應該知長定短,總之今日你已經睇咗。」我不願意讓他再「呃鐘」。
「我唔知呀!呢套係上次未睇曬今次睇埋,我唔知得返十分鐘呀!」阿豬反駁。
「係你嘅事啦,你自己唔睇清楚仲有幾多時間。」我繼續懶理。

然後,阿豬在梳化大吵大鬧。這種事在近期不時發生,一般我都是讓他冷靜,叫他等待下次機會。今次,我忽然覺得不是辦法,因為眼前的亂象是大人一手造成的。

「你...知唔知咩叫上癮?」我問阿豬。
「我知呀。」
「咁你覺得你自己咁樣係咪上咗癮?」

然後,我說我們本來有自由去選擇自己可以做甚麼(暫時尚算有這個自由...),例如可以選擇去看卡通片,去玩,去看書。但若上了癮,就會發現自己控制不了,甚至情緒也受牽連。是卡通片要選擇你,而不是你去選擇卡通片,基本上你是受卡通片控制了。(總之就是用他明白的方法說明「自由意志」)

「阿豬~阿豬豬~你淨係睇我啦,唔好食嘢啦,唔好玩啦,唔好沖踢波啦,你淨係嚟睇我啦~」說教完一大輪,我用擬人法扮卡通片惡魔,向阿豬招手。

「我唔係呀!我控制到自己呀,我而家去玩其他嘢!」說罷,他真的入了房砌Lego,相信是因為不想承認自己上了癮。他到第二天都沒有再提卡通片的事,隔天在原定卡通片時間才要求,看完了也沒有再投訴。

我慶幸阿豬病情不嚴重,今次尚算「救得返」,而我們當然也要戒掉口中那句「你有冇卡通片想睇?」來換取片刻寧靜。情非得已只是藉口,孩子的成長需要並不會因為我要work from home 而停下來。

未來繼續宅在家的日子相信不短,實在要認真想想益智的kill time 良方。

作者︰阿豬媽

原文刊於「湊仔爸與返工媽」Facebook專頁。本文標題為編輯所擬,原題為「情非得已」。

Go to top